許志安有首歌叫《流淚行勝利道》，騎士啱啱就做咗個最佳示範。大超班嘅佢哋周日作客贏塞爾特人101:93，以場數4:0輕鬆晉級，繼續向總冠軍之路進發，但今場損兵折將，對嚟緊嘅東岸準決賽影響唔細。
騎士嘅全能大前鋒路夫（Kevin Love）第一節就傷出，左邊膊頭俾主隊中鋒奧利尼克（Kelly Olynyk）扯到甩骹。經初步檢查，路夫起碼要唞兩周，好彩嘅話都要去到東岸決賽先可以復出；佢賽後就鬧爆對方，根本冇機會爭到個波，都故意整傷佢。
兩將打茅波勢停賽
話對手打茅波嘅騎士，其實都唔好得幾多；倒戈嘅柏堅斯（Kendrick Perkins）做單擋嘅時候，乘機將對手克魯達（Jae Crowder）推落地，搞到雙方爭啲大打出手。雖然柏堅斯當時只係被罰一個技犯，但分分鐘被秋後算賬；路夫已經傷咗，若然柏堅斯都唔出得，騎士內線將會好脆弱。至於加盟騎士後翻生嘅JR史密夫（J.R. Smith），唔知係咪想幫隊友出氣，同克魯達爭位嗰陣，借勢摑咗對方一巴，即時俾球證吹二級惡意犯規而被逐，睇怕都要停賽。
另一邊廂，巫師周日主場再贏速龍，創隊史紀錄首次喺季後賽橫掃4:0晉級。西岸戰線就比東岸激得多，快艇作客贏咗馬刺後，場數打成2:2，周二返主場再鬥過；而小馬喺主場終於贏到波，不過仍然落後火箭1:3，嚟緊仲作客，要晉級真係唔易。