虎父無犬子，喺車壇再有真實個案。車神舒密加個仔米奇舒密加，今年參加德國F4系列賽，慢慢走向F1呢個終極目標。16歲嘅佢上周六喺Oschersleben站處子登場，得第九兼攞最佳新人獎。到咗周日嘅頭場，米奇就攞第12，但好戲在後頭；熱夠身之後，佢去到尾場嚟料，喺安全車嘅「幫助」下首名衝線。米奇暫時以27分喺車手榜排第五。