有望成為本地「三冠王」嘅傑志，今晚香港時間七點半作客新加坡馬里士他卡沙，教練摩連拿賽前話對手鬥榜首柔佛DT嗰陣，戰況都好緊湊，所以估計今仗唔易踢。隊長盧均宜就話，由於比賽場地係仿真草，對喺香港練慣仿真草嘅傑志球員嚟講，絕對有地利幫助喎。（now670台今日7:30pm直播）
均宜話踢仿真草仲好
傑志上場亞協盃F組作客吞咗馬超球隊柔佛DT兩蛋，兼失埋個榜首位；不過，佢哋今日只要作客贏波就可以提早出線。星期日已經抵達當地嘅傑志，噚晚再到比賽場地惹蘭勿剎體育場踩場，摩連拿同盧均宜喺賽前記招都話要爭小組首名，所以對馬里士他卡沙同東賓高嘅最後兩場要贏晒。均宜話自己喺惹蘭勿剎體育場踢過幾次，呢度仿真草場地偏快，有利球隊攻勢，所以好有信心反客為主。事實上，傑志近年亞協盃作客新加坡好少失分，希望今晚順利贏波，攞咗個16強席位，之後再望首名資格啦。
