中國南車（1766）與中國北車（6199）去年底合併，自此成為港股通長期熱門股份，其升勢凌厲到被股民封為「中國神車」。自此央企合併的消息就冇停過，只要你諗得出產能過剩的行業都有傳過，例如鞍鋼（347）和寶鋼可以合併做「神鋼」，航運集團可以變「神舟」，三桶油就整合做「神油」，仲有「神煤」、「神電」、「神泥」……朋友笑說，就快全中國央企可以重組合併做一間公司，改名叫「神蹟」了。
「神車」過去幾個月狂升，究竟是因為合併真的有助成本效益？還是純粹憧憬「一帶一路」的商機？呢層並不重要，市場亦無興趣深究。最緊要是大市要升，你必須提供理由，而且係作都要作到出嚟。
如上周華創（291）宣佈重組，把所有業務賣乾淨，只剩下啤酒，仲有冇得追落後，就要睇你點評估雪花啤酒的估值。結果，由於要將估值「最大化」，券商提供N種計算方法，由PE到EV/EBITDA，又撇除呢樣、又補番嗰樣，最後大家除淨後的合理價，可以闊到由9元到14元都有。有分析員說，現在個客唔想聽風險，只想捽一個可以繼續把股價踢上去的故事，甚至會要求你計一個更高的估值畀佢。甚麼上客數好勁？好吖。但客戶質素跌緊？Sorry，呢部份聽唔到。
「神蹟」從來只在乎你信定唔信，最終是否可實現？已不是重點了。
海迪