季尾戲肉2000米女皇盃主隊香港馬一向硬淨，告東尼馬房之「將男」今日第八場夥拍郭能後發先至，末段以強勢殺出重圍爆15倍冷win，勇奪呢項國際一級賽，騎練雙雙首勝女皇盃創造歷史，今場馬兒獲獎金1,140萬。
「將男」在港累積七捷，連同上季奪董事盃、遮打盃及今季勝出馬會盃、女皇盃，共四勝分級賽，總獎金一下子由原本2,000萬升到突破3,100萬，堪稱大賽殺手，馬主奔騰賽馬團體真正名利雙收。
「將男」去年遠征杜拜得個桔，今季留港消費，前仗衝冕金盃落空跑第三，上仗精英碟三級賽1800米更落第，但今仗出戰總獎金2,000萬之女皇盃，趁馬王「威爾頓」遠征杜拜返港狀態未足，而前馬王「軍事出擊」賽前有小傷，得以取而代之贏馬。
郭能今個月12號騎「駿穎」墮馬整親，直到今場卒之贏番馬，打破接近一個月頭馬荒，兼且在港首勝國際一級賽，可謂苦盡甘來，他與告東尼笑到見牙唔見眼。
「將男」今場一頂二，兩身位輕取一對外隊馬日本「善得福」同澳洲「模範駒」奪冠，二至四名近乎平頭，「善得福」得第二，「模範駒」季軍，大摩最慘，佢連贏兩屆女皇盃後，今年3.9倍的「威爾頓」衛冕落空梗頸四。