神劇大時代重播，雖然只是前奏，但已經很精采，猶記得方進新見交易所股民炒股，無理身邊小孩，進新拿着水喉狂吼「你班人癲晒了，股票唔係咁玩㗎」，亦記得進新同玲姐講：「呢間就係人人都有份做股東嘅世界天線，無資產無業務都可以上市……。」
用仙股量度市況
前段日子，筆者有炒隻奕達（2662），曾經由0.8元跌到0.6元，粉絲在fb pm問我點算，我就講不用擔心，呢隻股少業務少資產，唔跌得去邊，答完之後，腦海就正正係想起世界天線。當然，奕達無世界天線咁神，上到1.2元，我亦放了，但神劇劇情，跨越時空，多年前的劇情仍是現在的寫照。進新好型，分析一針見血，贏盡男女觀眾芳心，但做股票，千祈唔可以學進新，因為眾人皆醉不能獨醒，否則就變成進新、葉天，號稱股神，但到頭來就係輸家。
近日，無資產嘅炒賣殼，有資產嘅有如鱷魚恤（122），十幾億都照樣賣盤，試問怎不叫人瘋狂，最恐怖嘅係炒賣這些細股的散戶仍以港人為主，內地資金染指殼股暫只在高層次，即上層財技活動，而底層瘋狂跟風炒作的是港人為主，尤其唔少新生代投資股市，就以財技股作為主力研究對象，對標準資源（091）、保興資本（1141）瞭如指掌，長和（001）同東航（670），唔好意思，唔熟！溫生孫生景生就好像多年朋友，往績手影，如數家珍，超人四叔？唔好意思，未炒過，唔熟囉！香港90後炒到有火，但內地資產未來接棒，即係火車仍在開動，有排都未到站，呢個瘋狂尋寶，仍在進行。當然唔少殼股已炒到1倍市賬率以上，震倉少不免，筆者估計近在眉睫，但呢啲只係中途站，距離終點仍有大段距離。咁？幾時到站呢？相信冇乜人識答，我梗係唔識。但我識另外一些情況，但凡真正牛市近99%港股會脫離仙股行列，即係除停牌外，得番一兩隻仙股，一日未出現呢個情況，絕對未爆煲到站。上周五還在仙股系列而又正常交易的個股有13隻，計有中建置地（261）、坪山（364）、美聯工商舖（459）、南海（680）、長盈（689）、永保林業（723）、泰豐（724）、中科（985）、偉俊（1013）、中國創新（1217）、科地農業（8153）、中國趨勢（8171）、俊文（8351，供股未除淨）。此外，已脫離仙股，但距離很少，較有機會掉回仙股系列的就有30隻左右。所以，大家不妨睇餸食飯，自己衡量。當然，就算全部脫離了仙股，也未必即時爆煲，只是較近終點站，大可放心。告訴你一個大秘密，尖沙嘴往荃灣地鐵，未到大窩口，係永遠都唔會到荃灣尾站，所以一日仲有十隻八隻仙股，你都唔使驚到了尾站，唔識落車。
至於，有些朋友「精甩鞭」咁，買晒所有仙股，到時就實賺囉，沒錯的，但唔知等幾耐了，而且十合一的也計算在內，所以可能無得賺，但吼住個名單，見異動就上車卻是可以的。當然，仙股上車容易落車難，套用葉天格言作結，取勝唯一法──「及早離去」而已。
張士佳