特區高官開始為政改落區宣傳，傳媒鋪天蓋地報道，但其實有幾多市民真係關注？
花生友都唔敢話好多，事關呢兩日同政界中人吹水，個個都係講港視風波，關注魔童王維基司法覆核勝訴，對特區政府有乜影響，多過政府呢一場仗，最終到底贏定輸。
就喺法庭還港視一個公道之時，一男子特首梁振英就喺當時話因為一籃子因素否決發牌嘅商務及經濟發展局局長蘇錦樑陪同下外訪。有政界口痕友話，有冇咁啱呀，兩位主角喺風頭火勢一齊避走？政府堅持個trip一早定咗，叫大家唔好咁多猜想。
咁唔向一男子翻舊賬，都可以檢視吓當時有乜嘢建制政黨力排眾議啩。有心水清政界中人話，如果大家好記性，就會記得建制派當時力撐政府拒發牌畀港視時，幾乎只有自由黨以程序公義為由，支持立法會用特權法查港視，據聞當時激到西環紮紮跳，但自由黨堅持有啲底線要堅守，唔可以無規無矩，終於喺兩年後獲平反，一吐冤鬱氣。
法律超人當年都撐
如果花生友係自由黨，可能都會喺嚟緊區議會選舉，重提港視發牌嘅立場，凸顯中立，抽水又吸票，何樂而不為？
但其實大家又唔好忘記喎，當年謝偉俊都好撐港視㗎，但卻被西環照肺，最終受壓下喺議案投咗棄權票。唔知呢鋪法律超人，會唔會攞番當時睇法，向西環證明千錯萬錯，其實只係一男子亂改遊戲規則嘅錯？
花生友