吳若希（Jinny）的媽咪上月底在大埔踩單車炒車，昏迷送院並要開腦做手術，吳母仍然留院時，Jinny的外婆又病逝，Jinny昨日凌晨突然在facebook貼出媽咪回家的照片，吳母坐在沙發看電視，Jinny留言：「Home leave回家，美好的時光，媽咪Un goo goo。」網友們送祝福。
「扭計似小朋友」
Jinny與魔術師甄澤權（Louis）昨午在銅鑼灣出席魔術表演活動，她說：「媽咪未出院，噚日只係放假四個鐘返屋企，媽咪仲要插胃喉，等喉嚨吞嘢暢順啲先可以出院，佢仲未可以照顧到自己，講嘢好細聲，病咗之後多咗情緒，扭計似小朋友，佢會識得唔捨得，有時會𤷪𤺧，會覺得我哋照顧佢辛苦。」吳母前日回家睇電視時，剛好播出女兒唱《美好的時光》，Jinny說：「媽咪睇電視見到我好開心，佢睇到拍手掌，好好笑，開心啲對病情都好啲。最初醫生話要兩個月，𠵱家未到一個月，就有咁好進展。媽咪仲要接受物理治療，訓練肌肉，有番力。」兩母女家中團聚，Jinny大爆攬住媽咪一齊瞓：「佢摸住我個頭，我同佢講做乜當我係Honey（愛犬名）。」
Jinny已向醫生申請下月10日母親節再帶媽咪外出，至於外婆死訊則仍未告訴媽咪，她說：「外婆身後事都安排好，等成件事搞好，媽咪好番先同佢講。」
再玩杯麵魔術
至於Louis早前表演「杯麵魔術」被網友踢爆穿崩，他昨日無懼再表演，並改良把杯麵變飯，並冇失手，他說：「咁多個魔術我最鍾意變杯麵呢個，意義重大，上次件事好多朋友鼓勵我，所以特別表演番答謝大家。」是否避過穿崩位？Louis說：「你哋唔會再睇到，唔會再走出嚟，呢個係變奏版，重新設計，希望娛樂大家。」陳凱韻（甘比）昨帶同一對子女來捧場，囡囡劉秀樺把一百元紙幣放入膠杯，Louis變了條金魚給她。
採訪：卓寶花
攝影：仇志德