澳洲騎師今日好神勇，第二場先有布文贏「阿甘」兼同羅理雅包辦鄉里Q。第四場四班千二米輪到羅理雅坐正，佢騎文廐「鑽飾傳奇」後上一攻而破，幫呢匹3.1倍大熱門打開勝利之門，亦幫埋文家良連續贏到第四個賽日，羅理雅季內齊頭贏咗20WIN，第一季做公司騎師都算有板有眼。
「鑽飾」系馬主吳國基今季首次在港贏馬，賽後拖男帶女總共二、三十人落凱旋門影頭馬相，場面墟冚。當中包括佢女婿兼澳門練馬師李家輝。外父有馬贏，做女婿嘅都唔差，事關李家輝喺馬交近兩次賽事都有馬贏。
講番「鑽飾傳奇」，彈甩贏連達文124倍之「再開心」，後駒內欄攝上跑第二，變成又開澳洲Q，三、四名則鬥到難分難解，內檔「火乘風」同外叠「雷神寶」一放一追，影相不分高下成為平頭季軍。而「鑽飾傳奇」搭「再開心」Q派彩高達1,868元，這麼冷落飛黨亦睇中著綠燈，涉及注碼雖然只3萬4千元左右不算多，但由於條Ｑ勁冷，落飛黨扣本後仍獲利約630萬，非常和味。
文廐「鑽飾傳奇」一連兩仗跑亞軍後，終於補中贏出在港首場頭馬，文家良賽後表示「鑽飾傳奇」演出越來越進步，今仗所造時間甚佳，希望牠繼續成熟，季內再取好成績。