警隊「一哥」曾偉雄下月5日就屆57歲退休之齡，就嚟要退下火線。曾偉雄喺警隊內外都被視為鷹派，作風強硬，上任警隊「一哥」以來鐵腕對付示威者，仲被外界冠以「禿鷹」外號。但原來曾偉雄不但唔介意呢個外號，更like爆話，禿鷹專食蛇鼠，似乎有啲言外之意喎！
話說上星期五晚係警隊四大王牌部門之一嘅毒品調查科成立60周年晚宴，唔少曾經喺呢個王牌部門工作過嘅警隊阿Sir都出席敍舊，包括喺上世紀80年代喺毒品調查科做過第一代無間道嘅曾偉雄。
毒品調查科盛產一哥
有出席當晚聚會嘅人士向八方報料，話有人席間膽粗粗問曾偉雄：「CP（警務處處長英文名縮寫），有啲人直稱你做禿鷹，你有乜回應？」曾偉雄意有所指地答：「如果你叫我做禿鷹，咁你就識嘢啦！因為禿鷹除咗食腐爛東西之外，仲專食蛇、鼠！即係蛇鼠一窩之類 。」
八方聽聞在場人士聽完曾偉雄咁講，一致拍掌叫好。咁到底曾偉雄口中嘅「蛇鼠一窩」，到底係講緊破壞社會治安嘅罪犯、抑或被警方視為破壞社會秩序嘅示威者？相信只可以依靠佢自己解畫咯。
講番毒品調查科，可以講係警隊「一哥」嘅搖籃，除咗曾偉雄外，仲有最少兩名前警隊「一哥」都做過呢個王牌部門，包括已過身嘅許淇安，以及前特首曾蔭權胞弟、現任上市公司新創建執行董事曾蔭培。
李八方
mailto:[email protected]