賭王何鴻燊三房千金何超雲同細妹超蓮，感情一向好好，因為超蓮喺北京打工，成日要周圍飛，所以好多時都鍾意同家人朋友喺Instagram更新近況，咁就可以知道大家做緊乜。而超雲噚日就放咗條喺泳池同狗仔游水嘅片，雖然只係得10幾秒，但已經搞到超蓮勁呷醋，兩姊妹更加隔空玩單打互寸，不過睇到佢哋嘅對話其實好有愛。
「你的不就是我的」
超雲喺Ig發片，着住泳衣同超蓮隻愛犬小吉游水，仲留言話：「小吉王子要游泳減肥了，加油」，超蓮即刻回應：「不要趁我不在欺負他喔但等我回來再減好了好可愛喔 」擺明呷醋嘅超蓮仲好眼利，見到浸喺水入面，唔多騷到身材嘅家姐原來着咗佢件泳衣時就再話：「不准穿我的泳衣」，點知超雲好賴皮咁話：「你的不就是我的」，超蓮見到呢句即刻食住上，照辦煮碗話，你嘅都係我嘅就冇問題。
超雲發覺自己講錯嘢，笑話：「我好像說錯話了你就別放心上」，最後超蓮答：「已太遲了！我已經牢牢記住了」兩姊妹就咁一人一句不停鬥嘴，非常搞笑。
撰文：馮仁昭