「殼后」朱李月華（朱太）唔止投資叻，搞party都有一手，佢旗下金利豐（1031）與先施錶行（444）上周六舉行聯合周年晚宴，佢用「Hollywood Night」做主題，畀機會員工扮鬼扮馬玩番餐之外，仲罕有開腔同老公朱沃裕合唱《現代愛情故事》，神秘嘉賓「Cool魔」張智霖突然中途加入，同朱太合唱，掀起全晚高潮。
Cool魔近年係朱太愛將，唔少朱太搞嘅活動都見到佢，聞說，剛任保良局主席嘅朱太，仲會搵佢做慈善大使㖭呀。
講番呢場晚宴，係喺灣仔君悅酒店舉行，場地掛滿改圖電影海報做佈置，朱生、朱太做番自己，冇特別扮演角色，其他人就好投入，好似朱太好友──黃玉郎與中國3D（8078）老闆蕭定一竟然撞造型，齊扮「魔盜王」，未來新抱羅之琦（Kelly）就扮韓星熱唱《Nobody》。可惜先施錶行聯席主席胡定旭冇影，唔通諗唔到扮乜？
