黎明早前實行坐半個鐘不動又要首衫的靜坐減肥法，成為網上熱話，昨日他型爆現身沙田馬場出席愛彼女皇盃賽馬日，記者讚他身形又弗了，問有否繼續靜坐減肥？他說：「停㗎，仲得了咩，黐線嘅咩，其實一星期後身體都會習慣，之後食健康食譜，早上食個麵，晚上唔好食澱粉質。」
好多人讚靜坐減肥法勁，但大家跟唔到，黎明發揮金句王本色說：「冇自信嘅人做唔到，人就係咁得意，上帝製造人類製造機會，如果個個都用我呢招，咪冇人發明新方式，冇新嘅發明囉，自信過龍減肥就會減到死咗。」問有否做運動減肥？他說：「運動要減完肥先做，有兩種，一係由第一日開始每日跑30k，一係就瘦咗先去做運動，唔係好易變阿諾舒華辛力加爆晒肌。我都係做簡單嗰啲，我又唔係拳手，拳手先要爆肌。」
如果有人搵他拍電影《激戰》張家輝同類角色？黎明說：「首先諗吓會唔會俾人笑，自己量力而為，我唔係要張家輝咁，調番轉叫佢拍《甜蜜蜜》吖，笑死人，如果張家輝做要轉體三周半踢爆交通燈，做出嚟都會俾人笑，總之就睇劇本啦，唔可以睇到自己都笑唔停。」另問到公司新動向？黎明說：「我哋係中轉站式經理人公司，唔係超級大公司，冇幾千萬去續約，新嘅藝人做到有毛有翅（翼）就自由飛走，如果我哋有三億，我都唔會畀囉。」
JW現身打招呼
剛巧跟黎明旗下AMusic約滿離去的JW昨到馬場，她坦言有跟黎明打招呼，問到對方指新人有毛有翅就飛走，JW說：「一齊做嘢係緣份，作為新人出道攞金曲金獎好榮幸，話唔定可以再合作，自己想趁後生出去闖吓，開心好多人搵我，自己都想試吓拍戲，做全能明星。」
此外，昨日許晉亨的愛駒「一寶」出賽，他單拖現身馬場，老婆李嘉欣沒有出席，避過跟過氣緋聞男友黎明同場，而許晉亨和黎明曾同時現身沙圈，但兩人沒傾偈。
採訪：盧妹
攝影：陳俊強
