去越南識坐一定係坐車？最勤力嘅鍵盤局長陳茂波噚日又喺網誌發表偉論，講到大嶼山除咗係長遠經濟發展重點，仲係港珠澳三地嘅匯合點，隨住港珠澳大橋同屯門赤鱲角連接路落成，佢話如果將大嶼山同內地高速公路網連接，到時一天車程就可去到越南邊境。嘩，咁行多兩日咪可以去埋隔籬嘅寮國同泰國？
陳茂波話，規劃署已經着手更新2007年《香港2030：規劃遠景與策略》，簡稱《香港2030+》，委聘咗專家同政策局檢討甲級寫字樓、商貿及工業用地未來嘅需求，亦委託咗顧問為大嶼山北部嘅主要商業用地，包括港珠澳大橋香港口岸上蓋、東涌新市鎮擴展、欣澳同小蠔灣填海計劃等等，進行初步市場定位研究，以求完善香港經濟用地嘅規劃。