血庫告急，民建聯都幫手谷血，噚日由新任女主席李慧琼Starry拉大隊到中區紅十字會捐血站「幫襯」，原來今年卅六歲嘅深水埗區議員鄭泳 舜Vincent，即係保良局前主席鄭錦鐘個仔、胡杏兒姐夫係處男捐血，獻出咗450cc大血包。
點解咁大個人未捐過血，唔通富二代真係唔捱得？眼見Vincent噚日捐血時笑意盈盈好輕鬆，相信都唔係因為怕血而避捐。佢向八方解釋，之前冇乜點諗捐血呢回事，獻出第一滴血後，相信陸續有嚟。佢話雖然有啲緊張，但唔覺得好痛，「可能以前成日整親隻腳，要接受治療，所以支針拮落嚟，都習以為常」。領軍嘅Starry卻冇捐，唔通臨陣退縮？原來係紅十字會職員話佢血紅素唔夠，叫佢今次慳番，下次再捐過。