港台節目《城市論壇》噚日傾政改，與會嘅學民思潮發言人黎汶洛同工聯會王國興傾出火花。
話說黎汶洛話勞工界喺1,200人嘅提名委員會中有60席，但係選民基礎卻只係得大約9,000人，反之工聯會就有成36萬會員，鬧工聯會冇為工人爭取投票權，又以標準工時為例子，鬧工聯會多次出賣工人嘅利益，成日「雙重標準」，激到王國興火都嚟，以學聯新任秘書長羅冠聰以37票當選為例子，批評黎汶洛係「雙重標準，收皮啦！」
老師：屬粗言穢語
黎汶洛即時要求王國興道歉，連主持人謝志峰都覺得王國興用詞不當，但王國興拒絕say sorry，堅稱「收皮」唔係粗言穢語而係「俚語」。佢席間仲攞咗本抄襲報章黑材料而成嘅《泛民收錢實錄》借勢抽水，話唔少泛民政黨收政治黑金喎。
八方問過中文補習名師周勤才，佢話「收皮」呢兩個字有攻擊性，意思係叫人「收檔」、「摺埋」，認為「收皮」可以歸納為粗言穢語，如果佢喺課堂聽到學生講呢兩個字，都會叫同學唔好再講：「大家斯文人，唔應該咁樣講！」