香港政治越趨「大媽化」Damanization，越來越具「中國特色」。
近日大鑼大鼓落區宣傳政改，689更臨場加插送蜜糖畀林鄭月娥做Show，而台上打頭陣竟是大媽集體唱遊內地洗腦神曲《小蘋果》，真係低處未算低，未來「普選」亦應如是觀。「大媽」殺入香港，豈止水貨客搶奶粉、益力多，雨傘運動期間到將軍澳工業邨瞓街攔車阻止報紙出街，到佔領區踩場，最近更殺入旺角西洋菜街「鳩嗚」聚集點大電視下唱遊，表演《小蘋果》及《瀟灑走一回》，準時十點放工。究竟大媽係新移民定深圳外勞僱傭兵，但總之就唔似香港政治文化一套。
大媽上台為政改落區活動揭開序幕，究竟係幫忙定幫倒忙呢？答案顯而易見，一般正常香港人對於呢款內地基層群眾扭秧歌廣場舞的風景，唔多受落囉。呢個表象背後涉及三人組政改民意戰部署之缺失，最後足以導致民意逆轉。條數係咁計，歷次選舉中得票比例建制派基本盤四成幾，泛民五成幾，政改民意戰要令支持「袋住先」去到六成以上，即係要撬走泛民內溫和支持者，但英明之特區領導們竟然搵左佬地區組織去幫手造勢宣傳政改，完全錯配，為做而做，求求其其。
即使政府欠地區群眾組織，也應由政府建制做樁腳搞宣傳，去咗陣「左味」及「大媽味」，𠵱家由地區左派做樁腳，擺明就唔可能爭取到中間派支持，反而會趕客。三人組越係同鄉紳老左搞埋一堆，本地中產、年輕人對政改越反感，結果政改落區就變成自殺式宣傳。政治係關乎群眾「觀感」，而落區只有蝕冇賺，越落區群眾觀感越差，民意支持越跌，就出動更多大媽，跳更多廣場舞小蘋果。政改三人組一開始就定位在爭取基層支持，亦由此度出一個反智口號「袋住先」，另不談理據，訴諸香港人功利精打細算，如果十幾年前攞出嚟用，就冇得輸。但𠵱家講緊香港最終普選模式，你用「大媽式」思維，即精打細算貪小便宜作宣傳重點，點可能爭取到泛民支持者轉軚？如此冇水平之論述，是政務官變成smart ass政客的後果，冇足夠政治修養所致。
要取得泛民中間民意支持，只有一個方法，就係要老老實實承認方案不理想，但希望市民將2017政改放在整個中國政治發展的context去看，而只有這背景下這一小步才有特別意義。目前硬銷八三一係全無意義，亦唔會增加民意支持。司徒華在世時，就是秉持這種大中華意識的務實主義。特區政府可悲之處，是一味玩弄權術政治，連對政改提出一套有水平的論述也欠奉，一味度金句sound bite，又要扮落區，又想威，又戴頭盔，幾十個示威者都怕，大龍鳳巴士巡遊連落車也唔敢，真丟架。
多得林大媽，有此「高水平」政改落區宣傳大計，為反對者提供平台作反宣傳。
添馬男