第七場1200米二級賽短途錦標係今日戲肉之一，跑落成為歐洲陣營天下，雙龍出海之英籍練馬師高伯新，搵兩位法國騎師柏士祺同柏兆雷幫手，結果「雙柏」分策冷門「誰可拼」同大熱「大運財」，兩駒一追一放之下，包辦27倍馬房Q。
「誰可拼」在三十七歲的柏士祺胯下後上建功，五歲馬今季轉高伯新馬房後兩度勝出，馬主鞋王Le Saunda老闆李子彬家族馬匹，季內累積取7win，鞍上人柏士祺在港首次贏馬即勝分級賽，可喜可賀。早前高伯新以「大運財」由蘇銘倫客串贏一級賽主席短途獎後，今次高伯新在更級際賽包Ｑ，不愧為大賽練馬師。
「誰可拼」今場蝕分爭大賽成為落飛黨點心，閘前獨贏落飛倒水咁倒，由原本30倍開外打到14倍啡燈開跑，落飛黨扣除70萬本錢後，獲利約950萬。
短途錦標每年例有1至3號細冧巴馬上名，對上三屆更兩度包Q，今年高分馬表現麻麻，1至3號馬之中僅有1號「大運財」入圍跑第二，第三名係灰馬「醒目波幅」，而「幸福指數」遠征完杜拜謝謝哋，衝落唔多只得第四。