尼泊爾發生大地震，唔少旅客急於撤離。噚日鳳凰網報道，中國駐尼泊爾大使館武官劉曉光喺機場幫手疏散，有香港人用普通話問「香港人也是中國人，大使館救我們嗎？」劉武官話「中國政府、中國解放軍保護每一個中國人！當然包括你們！」強國網民即時抽水，「現在想起來是中國人了」、「危難時機方顯祖國重要」。
得人救命梗係要感恩，內地微博亦流傳一封聲稱出自港人手筆嘅感謝信，話自己兩公婆地震當日趕到機場，港龍卻已取消航班，但竟然收到中國大使館短訊，話港澳、中國居民可以搭專機走，連機票錢都未畀，即日已經安全返到香港。感謝黨感謝國家……咪住，當日得一班港龍機飛香港，翻查飛行紀錄，班機只係delay冇取消。查清楚先寫嘛，咁就賺少五毫子喇。