建制派在立法會反拉布，但民建聯立法會議員、「元秋」蔣麗芸，上周四又再上身，間接幫人力、社記拉布。話說審議預算案時，元秋突然向人力「大嚿」陳偉業開火，拎番大?前日發言批評東江水猶如「屎水」兼好貴，話政府每年買多過用，猶如「倒錢入鹹水海」的言論來鬧。
元秋鬧大嚿日前言論令人咋舌，指東江每立方米只賣$8.8，絕對唔係貴，仲叫香港人要「感恩」：「人哋（廣東省）都係蝕本賣畀香港，希望大家有時飲水思源，你飲得人o既的水，就要感恩，唔應該今日喺度講風涼話。」
大嚿黨友、人力成員「慢必」陳志全聽完就梗係反駁，話港府過去8年向廣東省買咗但用唔着o既水，涉及50億港元，每年香港只需要8.5億立方米，但就同廣東省買成11億立方米，反問元秋：「點解港府所買遠超需要，但仍要買更多東江水？係政府根本無意節約，定有其他政治含意、政治決定？」慢必仲話，早排傳媒抽驗東江水，發現水中金屬含量超過內地標準，混濁度亦遠超國際標準，加上東江水配水庫受非法豬場糞水污染，所以大嚿話港府係「買貴的屎水」絕對正確。有議員同八方講笑話民記要反拉布，首要係搵人睇實元秋。