女皇盃日一年一度，各路雄師都屯重兵，希望為馬主攞威。當中新勝馬更是第一梯隊，被安排作為爭分主力。
近十年女皇盃日，新勝馬共取23勝22位（不計重頭戲女皇盃）。環顧今期(26日)十場賽事，新勝馬只有「精彩時機」、「開心得意」及「包裝奔馳」（同樣不計女皇盃），從投注角度，馬迷可集中火力(注碼)圍攻這三駒，力圖獲利。
第一場一對新勝馬「開心得意」及「精彩時機」均出自未達標馬房吳廐及胡廐，戰意已有保證，前駒贏完谷草千八轉田草二千米，五班賽程選擇少，如此部署無可厚非，吳廐最近有「帶盈來」取得連捷，「開心得意」打王牌隨時有樣學樣。至於「精彩時機」勝後加六分，仍負輕磅好跑，匆出料有打鐵趁熱之意，跟「開心得意」包辦連贏不奇。
第六場「包裝奔馳」上仗以極快時間贏馬，蹄下敗將「行善積福」及「天才」再出分別入Q及贏馬，水準可見一斑，勝後路程照舊，依然是1400米，連捷行情高漲。