咁多年來，揸車上落跑馬地山光道唔知幾多次，但次次嘅目的地都係馬會會所，冇在路傍停頓過。馬會會所下面係舊馬房，已廢置多年，今年開始拆卸，重建為另一個馬會會所，與舊會所相連，新會所主要特色係有一個大泳池，你知啦，好多知名人物朝朝在馬會游水，早上泳池有人滿之患，既然起新會所咯，加建一個新款大型泳池最符合會員要求。
舊馬房/新會所下面就係東蓮覺苑及寶覺小學，老香港梗知道呢個拜佛地方係何東爵士夫人張蓮覺在戰前興建，用以參佛唸經及辦學之用嘅。左丁山一向以為呢度係私人地方，從未入過去，點知兩星期前突然收到中大師妹溫詩雁嘅電話，邀請左丁山去參觀，原來佢跟新鴻基地產嘅前公關主管大員May Lau大姐為東蓮覺苑做義工，與丁新豹博士及行政人員策劃咗一連串推廣活動，搵傳媒人士遊覽東蓮覺苑。師妹叫到，又話明有丁博士講解，當然立即應承。
於是乎四月十五日中午坐的士到山光道，就在東蓮覺苑大門停車行入去，迎接者係行政總監區建群，佢介紹自己係新亞歷史系（1977）校友，退休前係將軍澳寶覺中學校長，跟住見到張健波、張劍虹、陳早標、游淑儀、關慧玲、陳碧霞等成班中大傳媒界校友殺到，又有黃奕鑑夫婦，好似係開校友會咁款。
丁新豹不久後帶領我地一行二十幾三十人參觀，加插中大建築學院教授何培斌講解東蓮覺苑之建築特色及設計特點，丁公導賞已令人聽出耳油，加埋何教授介紹，我地直情係上咗一堂通識教育，對1920-1940之香港建築，民國名人與何東交往之典故，大大加深了認識。唔睇唔知，苑內有民國總統黎元洪徐世昌、總理梁士貽、財政部長葉恭綽、立法院院長胡漢民、清末進士賴際熙、張少帥學良等人之親筆題字，又有康有為來港避難靜居時所親撰之對聯，兼且佛教高僧虛雲老和尚、筏可大和尚、若舜法師、靄亭法師等人留下墨寶，今日觀之極為珍貴，唔怪得東蓮覺苑被列為本港一級歷史建築。左丁山以前有機會到何東花園飲下午茶及遊覽花園，知道內裏並無戰前名人遺蹟，何東家族與洋人及民國大人物之社交來往幾乎全在西摩道舊宅與東蓮覺苑舉行，何東花園大宅之建築亦無東蓮覺苑之特色，比較起嚟，保留東蓮覺苑，重建何東花園係相當適合嘅。