蘇偉賢馬房隻「創基寶」，上季在田草1200米一出即勝，擊敗比佢年長一歲嘅實力馬「萬事盛」，爆出15倍冷win，「萬事盛」之後取得三場頭馬，可見「創基寶」嘅潛質應相當高，但現實係「創基寶」開齋後至今再跑15場，經常都係二二三三，未再贏過。
如果探究原因，檔位可能係一大因素，「創基寶」可以話非常冇運，單係今季六次排九至十四檔，唔贏有乜出奇？不過今期(26日)就唔同咯，有好多向好嘅變數，首先執個五檔好位，其次增程初跑1600米，隻馬父親「威利好好」在港贏1800米，響新西蘭更贏到2100米，而母系家族成員，部份亦贏至2000米以上，血統有長力。最重要係據知馬主歐陽啟初，下個月將與靚靚女友拉埋天窗，蘇偉賢梗會識做，必盡力為「創基寶」取得突破贏馬，就係最佳嘅新婚賀禮。
歐陽啟初不嬲響澳門亦有養馬，而香港方面除咗「創基寶」，今年二月初佢以70萬港幣，暗標投得二手馬「瀟洒勁龍」，最近「瀟洒勁龍」易主後上陣力拼屈居亞軍，歐陽啟初贏馬不成，自然將寄望放喺「創基寶」身上，鬥志絕對唔成問題。