上星期內地股市繼續創金融海嘯後高位，上交所更因為成交金額太多一度爆錶，人行又一次過大幅降準1%，勢頭似乎大好，但亦因為勢頭太好，宜開始謹慎。人行降準通常一次減0.5%，今次一減就減1%明顯落重手，問題係點解要落重手？
內地降準、減息其實有路捉，首先回歸一個最基本嘅經濟原理MV=PT。2014年中國GDP為63.6萬億元（人民幣．下同），年末M2為122.8萬億元，貨幣流速就大概係0.5。中國要保持GDP唔好急插，由8%到7%再到6%每年慢慢放，惟有每年谷M2增長11至14%。
中國嘅基礎貨幣，過去由於中國主力做出口大國，基礎貨幣增長主要來自外匯佔款。但現時外圍打緊貨幣戰，日本、歐洲等競相貶值頂爛市，美元則升值萬劍歸宗吸水，中國要人民幣國際化，匯水要同美國爭利唔敢大貶，結果出口難做。再加上中國經濟下滑中，有錢離開緊中國，3月銀行結售匯已連續第八個月錄得逆差，為4,062億元，創2010年有紀錄以來最大；而且第一季度人行外匯佔款減少2,521億元，去年同期增加7,879億元，一來一回等於少增10,400億元。
所以人行要降準。現時內地一般性存款餘額約110萬億元，人行每減0.5%存款準備金率，就會釋放6,000至7,000億元流動性。坊間估今次降準1%會釋放流動性1.1萬至1.5萬億元，條數係咁嚟。將降準條數同M2、外匯佔款拍埋就明白，假如GDP要保持7%，M2要谷14%，即係要新增貨幣約17萬億元。而中國現時嘅貨幣乘數大約係4時，意味基礎貨幣就要增加4萬億元起。
外匯佔款有上落，先唔當佢負增長，假如零增長，再加埋其他SLF、MLF、PSL等工具，同埋財政性存款投放等，點計人行都要主動投放多2至3萬億元基礎貨幣。減一次存款準備金率會釋放6,000億元流動性，2到3萬億條數自然就係五次左右。今年2月人行已減過0.5%存款準備金率，上星期減1%，大概即可預期下半年會減多一到兩次，視乎減嘅幅度。
但貨幣政策嘅嘢同識女仔一樣，初初識個靚女覺得好索，兩個月後覺得幾靚，半年後覺得OK。美國QE都係三次停，因為邊際效用一路跌，所以A股因為人行貨幣政策嘅刺激作用將越來越低。而且從技術走勢而言，滬綜指4200至4500點似係轉折期，轉折期唔一定係插，可以係高位震盪或橫行，牛市格局未變，但呢個時候宜開始謹慎，唔係大手高追嘅時候。
Mr. Tregunter