759阿信屋繼雲吞麵、麵包,𠵱家連玩具都賣埋。話說噚日759阿信屋喺佢個facebook專頁賣關子話,即將會喺上水彩園廣場,開間叫「759 Toysland」(圖)嘅臨時賣場,但到底個賣場有咩玩具賣?實際會喺幾時開張?個post就冇提到。
從相片睇,貨架上有Thomas火車頭同反斗車王McQueen等玩具,同一般玩具舖大同小異,但就連嬰兒紙尿片都有得賣,仲要係日本同韓國牌子都有齊。
費清嘗試打電話搵759阿信屋創辦人林偉駿,可惜聯絡唔上。林偉駿上年就向傳媒透露過,想喺九龍城開玩具店,賣日本同國際品牌玩具。759 Kawaiiland沙浦道分店係有兼賣玩具,但根據阿信屋網頁資料,上水呢間睇嚟真係第一間真真正正嘅759玩具店。
有網民話期待開業,但亦有人批評,阿信屋啲貨來來去去都係嗰幾款,冇咩新意;有人就話阿信屋越做越濫,不如下次開759成人玩具店!
費清
#要生計,也要生活 #毋忘初衷