工聯會理事長吳秋北近呢年幾都好惹火，高調反佔中，帶頭話要引入內地《國安法》，身為標準工時委員會勞方代表嘅佢，又因指認同以合約工時取代標準工時，出賣工人權益，俾前輩工聯會榮譽會長陳婉嫻公開批評佢經驗不足，不過吳秋北對嫻姐教誨，似乎麻麻哋受落。
話說工聯會新一屆領導噚日同傳媒茶敍，吳秋北話無端端成為傳媒焦點，佢被問到俾嫻姐話佢「經驗不足」時，更加有啲憤憤不平。吳秋北話，當日認同合約工時只係一場誤會，話嫻姐雖然係一位佢好敬重嘅工會前輩，但對於「經驗不足」之說，佢就有唔同睇法，聲稱唔會因為對住傳媒就演戲：「如果你叫我扮精明，講我自己有幾精明，我係做唔到。」
冇打算選立會
佢之後仲話，自己有本身性格，唔會演戲撈政治本錢爭曝光，「所以我唔會喺傳媒面前演戲，『喂，你出賣工人利益。』撈取政治曝光」，雖然政客要選舉，爭上鏡、博見報係常識，不過佢就話自己冇參選立法會嘅打算喎，但就算唔參選都好，吳秋北咁回應嫻姐，正所謂言者無心，但聽嗰個有意，令人覺得似乎句句有骨，可惜八方噚日未搵到嫻姐，問佢對吳秋北咁講有乜睇法！
李八方
mailto:[email protected]