民建聯前排大換血，一眾舊人順利交棒畀新人，身兼行政會議成員嘅女將李慧琼當選主席，成為民記首位女主席。就喺民記改選前後，花生友聽過不下一位民記內、外嘅人擔心，李慧琼做民記主席當然冇問題，但係要佢擔當埋建制派領導就有啲疑問，矛頭仲直指經民聯林健鋒㖭。
以往譚耀宗做民記主席嘅時候，譚耀宗仲負責埋統籌建制派嘅工作，就好似日前政府公佈政改方案後，建制派吹雞撐政府，坐前排中間嘅就係譚耀宗，反而身為建制派第一大黨民建聯主席嘅李慧琼都只係靠邊坐。
資歷淺 壓唔住場
民記改選前已經有民記中人擔心，李慧琼仲後生，喺議會資歷尚淺，其他建制派咁多阿哥阿姐，恐怕李慧琼壓唔住場，未必「搞得掂」班大哥大姐。於是花生友就追問，究竟係邊啲建制派咁難搞呀？呢位民記中人就話：林健鋒囉。
咁又係喎，繼民記之後，經民聯就係立法會內建制派第二大黨，林健鋒又係行會成員，而且議會資歷比李慧琼深厚得多，佢會覺得有乜嘢理由要聽李慧琼支笛，好出奇呀？
花生友好公道嘅，有人咁樣講得，梗係問吓當事人點睇喇。林健鋒就話絕無此事，仲大讚李慧琼係相當有能力嘅人，而且一直以來同李慧琼都合作愉快，相信將來亦都一樣。
將來嘅嘢，都係將來先算，反正民記老將都唔係一下子放晒手，而係逐步畀班新人接手，至於將來班新人係龍係蛇，就真係睇佢哋造化喇。
花生友