嶺大之前舉辦音樂會，有表演者獻唱批評警隊濫權嘅粗口歌曲，惹起「正義聯盟」同「撐警大聯盟」嘅不滿，各「正義之士」噚日就去嶺大同多間大學踩場，批評唱粗口歌係辱警，直斥學校道德淪亡同藏污納垢，帶隊嘅退休高級督察發言人冼澤正仲大罵「誰人無父母，點解要老母」，以粗口諧音警告學生：「你老母對你唔好唔關我哋事，我個老母對我好好，如果你再小警察老母你自己小心，我哋真係唔能夠忍！」
噚日東區區議會亦講到辱警，有區議員大讚警隊，話佢哋絕對唔係黑警，亦唔係以前啲有牌爛仔，警務處處長曾偉雄就順勢批評辱警行為，話佢哋「是非顛倒、黑白不分」，只會引起更多問題。