特區政府日前推出政改方案，即日又落咗去美孚搞場大龍鳳，以為可以宣傳政改，點知特首梁振英一落到去又發生衝突，卒之咪又係宣傳唔到。政改三人組成員之一嘅政制及內地事務局局長譚志源似乎唔係幾甘心，噚日接受電台訪問時又K癮發作，想用歌聲表達自己嘅心情。
不過譚志源冇唱出嚟，只係讀咗《天各一方》裏面一句獨白：「你有你嘅生活，我有我嘅忙碌」，希望反對派唔好再狙擊落區嘅官員，總之「大家各有各講、各有各做，冇謂做啲狙擊嘅事喇」。歌名已經說明一切，政府同泛民「天各一方」，即係大纜都扯唔埋，用咁嘅態度，政改又點會有機會通過到呢？