特區政府公佈政改方案後，北京同港府梗係關心民意走勢，八方聽聞社論仍然係佢哋評估民意指標，噚日網媒《立場新聞》分析主流報章社論，除《蘋果》社論係反對袋住先，《明報》、《星島日報》、《東方日報》、《太陽報》、《信報》、《南華早報》、《頭條日報》、《文匯報》、《大公報》、《商報》、《成報》、《新報》都係支持袋住先，《經濟日報》則評為「未確實表態」。若果單睇社論分析民意係咪支持袋住先，咁肯定支持唔只有六成，而係九成民意都支持，但有泛民中人同八方講笑，若民意真係咁，泛民一早轉軚！又話好多社論用今次政改同2010年比較唔公道，當年北京一直有同民主黨傾，但今次乜都唔讓，咁點袋住先呀！