今季季後賽最矚目嘅首圈戲碼周三上演第二戰，作客嘅馬刺加時後以111:107險勝快艇，追成場數1:1平手，主將鄧肯（Tim Duncan）仲創下個人新里程碑㖭。嚟緊兩場返主場打，氣勢如虹嘅馬刺將要把握機會，力爭領先。
今個周六將滿39歲嘅鄧肯，果然係不老大前鋒，今場搏足44分鐘，交出全隊最高嘅29分同11個籃板，個人職業生涯第100次，喺季後賽單場錄得20+得分同10+籃板，季後賽累積得分仲去到5,027分，成為NBA史上第五位突破5,000大關嘅球員（見附表）。
尼納特當選最佳防守球員
除咗鄧肯，快艇嘅比歷克格芬（Blake Griffin）亦首次喺季後賽錄得「三雙」。呢位新一代全能大前鋒貢獻29分、12個籃板同埋11次助攻，可惜球隊贏唔到今場繼續採用「Hack-a-DJ」犯規戰術嘅馬刺；今季常規賽罰球命中率唔夠四成嘅快艇中鋒D佐敦（DeAndre Jordan），喺對手故意重點侵犯下，得到17次射罰球機會，但只係入咗六球。扳回一城嘅馬刺搶到主場優勢，未來兩場如果喺主場順利贏波，就可以領先到場數3:1。不過，控衞柏加（Tony Parker）今場因傷退下火線，唔知有幾嚴重喎。贏波翌日仲有好消息，聯盟宣佈馬刺小前鋒「大手王」尼納特（Kawhi Leonard）當選今季最佳防守球員。
