呢個星期日英超有榜首大戰，仲係倫敦打吡，阿仙奴對車路士。大家同樣踢咗32場，只係剩低六場，車路士依然居高臨下，領先阿仙奴有成10分之多。
對於𠵱家積分榜上嘅形勢，摩連奴曾經咁講：「今日我哋攞到三分，對手就直接冇咗三分。只要專注自己就可以，仲有六場，應該八分夠數！」由以上對話嚟睇，證明摩帥對兵工廠呢場賽事，三分絕對志在必得！咁又係，對上三季六次交手，阿仙奴只係贏過車路士一次。
阿仙奴上一場比賽係英足盃準決賽，對住雷丁都要加時先贏，決賽對維拉下個月再諗，呢個星期先應付咗主場對車路士先。雖然有難度，但係阿仙奴數字上都仲有機會贏冠軍，所以今場戰意一定唔使懷疑，球員亦會全力以赴，話晒主場聯賽已經九連勝！車仔今場應該會打穩守突擊，甚至擺大巴。兵工廠一定要有耐性，同埋上半場唔可畀對手先入一球，如果唔係要贏波就難上加難。雖然大家都好想贏，但係去到呢啲關鍵時刻，和波會係大家都接受嘅賽果。摩連奴咁識計數，呢場入波應該唔會多，我就估1:1機會比較大。
LULU