這晚谷草賽事有一個冧巴好旺，就係5號馬，除咗頭兩場唔入三甲之外，由第三場開始殺到去第七場，5號馬「勝利雄心」、「歡笑多多」、「友瑩養」、「紅海灣」同「金獅叻將」跑落非冠即亞，買Q唔預佢哋注定冇錢收。
講番第六場三班1200米贏馬之文廐馬「紅海灣」，首次戴眼罩跑，表現脫胎換骨，在田泰安胯下後上衝贏「伽楠」開齋，文家良連勝三期共取五win，旺過唔少冠軍級練馬師，而田泰安亦憑呢匹新座騎，保持今個月谷戰例贏未斷纜。賽後「紅海灣」馬主八爪魚團體邀請前男藝人尹揚明拉頭馬。
「伽楠」跑開田草，今次轉來谷草，閘前着綠燈，功虧一簣只得第二。至於雷神接手「光輝之星」後追第三，算有交代，第四名係「爆炸糖」。反而大熱門「心花怒放」跑落冇料到落第。
「心花怒放」馬主蘇智恒與娛樂圈人士相熟，此駒上次贏馬，無綫兩靚仔藝人謝東閔和張振朗有到場，但因衣著問題被拒拉頭馬。今次見另一男星陳浩民與太太蔣麗莎到場，做啦啦隊為「心花怒放」打氣，陳浩民說自己第一次處女入馬場，西裝骨骨準備影頭馬相，點知「心花怒放」卻死火收場，蘇智恒始終無法與明星老友一起揚威凱旋門。