今時今日做傳媒，少張infographic都唔得。噚日政改方案大單嘢，當新舊傳媒都諗緊點表達入閘、出閘等幾重關卡意念，網民Sam Kong一張「2017香港特別行政區行政長官選舉方案簡介（超簡化版）」（圖），已經K.O.各大媒體，張圖意念嚟自電影《人形蜈蚣》，得到廣大網民傳頌。好嘅圖，盡在不言中，總之個個見到都驚呼「世事都俾佢看透了」，之後仲惹嚟《熱血時報》同埋社民連改圖，八方深信如果Sam哥肯加入傳媒，肯定係一粒巨星。
另一張備受網民追捧嘅作品出自infographic「後起之秀」《文匯報》手筆，呢位行家如實咁呈現咗2012同2017特首選舉制度分別，令巿民好明白自己就係多咗出嚟嗰堆茄喱啡，唯一敗筆係2017個入閘票數比例係10分1，佢寫錯咗8分1，可能趕住即時出街冇留意。