超級英雄年度科幻巨製《復仇者聯盟2：奧創紀元》前晚首映，眾星異口同聲表示愛連場打戲而給滿分10分，周家怡則嫌開場文戲略長要扣分。
周家怡 9分
「我好鍾意睇打戲，每幕打戲我都覺好精采，特別結局團結打壞人，打戲中又有笑位，打中有幽默，我畀9分，扣1分係開頭我嫌文戲長咗啲，可能我唔記得咗第一集先唔明。」
李綺雯 10分
「我覺得呢部戲嘅3D好正，最鍾意係黑寡婦一角，印象最深係變形俠醫喺緊急情況下變怪獸救黑寡婦。今集有加入新角色，可惜死得太早，我諗係咪伏線下集會翻生？全套戲冇冷場，畀10分。」
陳偉成 10分
「我畀今集有10分，每幕打鬥場面都超勁，尤其Iron Man同變形俠醫內訌打起嚟，Iron Man隻右手爛晒，佢急call後援嚟整番，特技好正。美中不足係結局太完美，太輕易將敵人打敗。」
張敬軒 10分
「成套戲冇得彈，10分滿分，我睇到忍唔住嘩嘩聲，無論場面同特技都好正，劇情又緊湊，演員個個都好有發揮，既有娛樂性，也有藝術性，唯一可惜係戲中冇Pepper同鐵甲奇俠呢part。」
