噚日發表嘅審計報告，第6章〈受傷及致命個案的僱員補償〉第48頁提到，署方今年1月22日到過銅鑼灣羅素街查訪39個工作場所，睇吓喺唔喺勞工處資料庫裏面，結果得出：「有9個（23%）納入資料庫內，因此自開業以來都沒有勞工督察前來視察」。
八方頴爆頭都諗唔明呢條哲學邏輯題，既然有9個工作場所已納入資料庫，點推論出呢啲工作場所都冇勞工督察視察呢？後來問過勞工處新聞組，發現報告英文版係咁寫"Audit found that 9（23%）of the 39 workplaces were not included in the database"，審計署話以英文本為準，承認中文版打漏咗個「未」字，正確應為「有未納入資料庫內」。至於會唔會重印，署方話要再商討。但如果重印，條數又點計呢？睇嚟審計署都要請番個校對把關先得。