噚日出爐嘅政改方案，由於內容建議提早曝光，對外界嚟講，完全冇驚喜，反而特首梁振英連番搶閘講政改，卻令唔少人「另眼相看」，事關明明係由政務司司長林鄭月娥專責嘅事，CY卻爭住公佈兼瞓身落埋區，似乎都係要證明自己有參與兼有主導權。至於佢呢番熱心同熱誠，係幫忙抑或幫倒忙？唔好逼花生友講出口。
早見傳媒晚寫網誌
查實噚日喺林鄭11點去立法會公佈政改方案前，CY已經搶閘喺10點鐘帶住政改三人組見傳媒，表明政改冇讓步空間、亦話落區對佢冇難度，聽落政改好似佢主導；到三人組喺傍晚閉門見傳媒，CY又喺會面前發表網誌喎，話政改方案只係差嗰幾票，繼續顯示係政改主要戰將。
點知到夜晚，佢仲變身神秘嘉賓，落埋美孚宣傳政改，仲帶蜜糖去「慰勞」林鄭，輕易成為焦點。有政界花生友笑笑口話CY連番搶閘呢招認真絕，擺明唔想畀民望好啲嘅林鄭搶晒鏡，亦要顯示林鄭都係佢下屬；政改呢家嘢，都係操控喺佢手中。
有政府中人噚日話喎，CY過去一年五度上京，次次都喺見領導人時講政改，並反映港人意見，形容佢係特區政改嘅司令員喎。嘩，乜原來CY喺政改上咁有心有力？真係失覺咯。
花生友相信唔少人好想唔知道，只做不說務實型林鄭，下下俾上司喺關鍵時刻搶風頭有乜感受？花生友聽聞，林鄭喺搞政改期間都有唔少沮喪時刻，甚至諗過要放棄；若然政改唔得，佢一定好心罨。
花生友