前日本欄提及，2013年有內地股民質疑上市公司造假，結果要坐監。呢啲仲只算係個別公司，勾結地方政府行為。但噚日新華社旗下《經濟參考報》發表文章，話要提防唱淡者擾亂股市，要嚴懲不法造謠者，已經代表中央警告股民，唔准睇淡A股，否則後果會好嚴重！
文章指，有人借上周五中證監規範槓桿資金消息，指市場必然暴跌，係嚴重擾亂市場秩序，不利於資本市場發展，必須重懲肇事者。中央級喉舌人民網上個月亦發表文章，指中國股市已走到關鍵時刻，不容許渾水式做空擾亂市場，必須依法嚴厲打擊。
有人話，而家中央有好多大計，都要靠股民埋單，未抽完水之前，點可以允許散水？內地所有券商都是國企，阿爺講到咁白，唯有一路唱好，直到最後爆煲，全世界攬炒為止。
黃尹華