人稱肥胡嘅胡定旭自從上月底拍住「殼后」朱李月華，做咗朱太旗下先施錶行（444）聯席主席之後，好似越來越多新動向，噚日佢就被委任為「國務院深化醫藥衛生體制改革領導小組專家諮詢委員會」委員，屬於首位獲國務院委任嘅香港人。
呢個委員會嘅名認真係水蛇春咁長，將特區政府早排成立嘅「降低食物中鹽和糖委員會」都比下去了。呢個專家諮詢委員會早於2011年成立，主要由與醫改有關嘅專家學者組成，向阿爺提供專業意見。
肥胡加入先施錶行，就係要幫公司搞海南博鰲國際醫療旅遊項目，𠵱家佢再獲委任為呢個諮詢委員會嘅委員，喺內地醫學界嘅地位似乎更加鞏固，先施錶行轉型嘅故事亦更加似樣喎。其實，自從公司宣佈肥胡加盟之後，累計有2倍升幅，肥胡手上嘅認股權亦越來越值錢喇。