瑞安房地產(272)老闆羅康瑞有「上海姑爺」之稱,一向官仔骨骨,66歲仍然好睇得,喺瑞房最新一本年報,羅康瑞直情擺自己上年報封面㖭呀。
上市公司年報嘅封面一向冇乜特別,通常都係風景、圖案,再加口號之類,瑞房以往嘅年報亦係呢類,悶出鳥來,點知最新呢本落咗張有羅康瑞跟幾位同事睇地盤嘅相,佢零零舍舍戴住頂紅色地盤安全帽,一望就見到佢。
大家都知羅康瑞太太,即係最美麗港姐朱玲玲醉心攝影,前年羅康瑞喺旗下佛山嶺南天地舉行宣傳活動,朱玲玲全程充當攝影師,幫老公羅康瑞等人影相。唔通年報呢幾張相都係羅太操刀?華華走去八卦一輪,原來呢件事唔使出動羅太喎。