恒基地產主席、人稱四叔嘅李兆基，2月中預言港股會上到27000點，只係短短兩個月，恒指唔單止閃電到價，仲已經上破過27000。呢位似乎料事如神嘅「亞洲股神」，噚日再度預測後市，仲以股市呼籲市民袋住先。
四叔噚日透過發言人預言恒指好快就有機會升到去29000至30000點水平！睇到呢度，作為散戶嘅你梗係諗住瘋狂掃貨。且慢！事關今次四叔作出呢個預言時，加入一個關鍵條件，就係「如果政改獲通過」。
佢話如果政改過到，咁香港政局穩定，自然就好世界，引用政改宣傳口號，總之恒指一定得，對經濟有利，恒指好快就到上述水平㗎嘞。但如果通過唔到，市場未出現好消息，大市就只可以喺現水平徘徊，現牛皮格局。八方相信就政改三人組都未必估到四叔用股市會大升，幫手呼籲市民袋住先，估唔到亞洲股神呢鋪為咗政改咁鬼博。
誠哥：不敢預測
至於另一大孖沙李嘉誠點睇後市同政改關係？長和發言人就話，超人喺周一股東會講過「不敢預測」，勸股民切記量力而為。
政改通唔通過對大市真係有影響咩？參考2010年政改爭議，當年5月29日時任特首曾蔭權發起「起錨」宣傳，到6月25日政改獲通過，大市近一個月間，升幅超過900點。及後港股一直攀升，至2010年11月上旬見25000水平，由5月底計，累升6000點。歷史會否重演，大家不妨買定花生睇好戲。
李八方
mailto:[email protected]