近日捲入涉嫌歧視風波嘅新民黨主席葉劉淑儀，因為早前撰文叫外國傳媒多加留意，香港有大量菲傭淪為外籍男士嘅性資源，惹起菲傭同菲律賓駐港總領事館嘅不滿同關注。八方噚日問過葉劉，佢話自己冇理由要道歉，因為只係提出關注同問題箒，「成篇文係一個問號，關注佢哋（菲傭）有冇被剝削，唔係指摘任何人」。但事件既已引起菲領館發聲明，關注葉劉用字不當，葉劉亦迅速喺前日去信菲領館，話無論自己同菲領館嘅用字都係相當溫和，覺得只係部份人炒大件事咋喎。但即使雙方客客氣氣，早前建議菲律賓以後唔好畀葉太入境嘅亞洲外傭協調組織繼續狙擊葉劉，今日會到新民黨辦公室抗議，不滿葉劉係種族主義者、性別歧視者同排外人士。