英超足球隊贊助費好揦脷，近年致力削減成本嘅渣打（2888）竟然冇慳呢筆錢，繼續贊助英超強隊利物浦，再簽3年，市傳新簽贊助費高達3,000萬英鎊（近3.5億港元），加價五成，渣打「嘜頭」就會繼續印喺球衣上面。
市傳日本銀行野村都虎視眈眈，最後輸咗畀2010年就開始跟利物浦合作嘅渣打。渣打總裁冼博德指，利物浦好波又夠國際性，有助銀行深化同客戶關係，將來除咗球衣有渣打logo，球員仲要幫手做渣打嘅顧客推廣活動。
有口痕友就認為，利物浦足總盃四強止步，球隊靈魂人物謝拉特又即將離隊，將來仲可唔可以維持住英超強隊地位有啲疑問，呢3億幾好似唔多值。不過睇番最受歡迎嘅球隊曼聯，同保險公司Aon簽8年合約，市傳代價1.8億英鎊，咁利物浦個叫價又唔算貴。