華創（291）日前宣佈把所有非啤酒業務以280億元全數賣予阿媽華潤集團。華創解釋，由於「市場環境改變」，令兩年前併購回來的英國Tesco中國業務，有排唔可以扭虧，為免投資者失去耐性，故決定「由母公司承擔風險」，體現「集團對華創的無限支持」。
分析員朋友直言，這單刁由公佈第一日開始，市場就已睇淡，事關Tesco中國出名蝕得甘，況且內地超市面臨網購挑戰，已不是一朝一夕的事，華創自己當年睇唔通前景，在這樣的背景下仍選擇做大型併購，「真係恃住有個富媽媽包底，就可以亂fing股東的錢？」。
當日華創「買大咗」，如今華潤接手，睇落阿媽好似好抵得諗？海迪有必要提醒各位，是次華潤收購非啤酒業務作價，無論點計都係below-book，由半價到八折不等。雖然詳細每項資產是如何估值，仍有待華創出通函才可得悉，但值得留意，華潤買入的資產，除了蝕錢的零售業務外，還有逾百億元香港投資物業，包括旺角中心、荃灣南豐中心部份樓面，以及銅鑼灣怡和街樂聲中心等多個核心地段物業。華創去年業績顯示，這批投資物業賬面值為211億元。
仲有，華創截至去年底有現金207億元，債務289億元，幾多會隨着出售業務被華潤帶走？幾多會留在華創？華創日後是否仍有大作為，需睇清楚通函方可判斷。
海迪