雷神今季每逢停賽期滿復出，例有好成績，呢晚跑到第三場四班一哩，佢贏大熱門蘇偉賢馬房的「勝利雄心」，此駒居前直路一早透出，末段雖成強弩之末，但雷神即係雷神，騎功搭夠，出盡九牛二虎之力，令到「勝利雄心」一隻頂兩隻，力壓分從內、外欄殺上之次熱門「國粹精華」同半冷門「勝算高」，險勝短馬頭位，取得個人復出第一win之餘，3.2倍大熱亦力保不失。
「勝利雄心」投賢廐後準到冇朋友，季內11戰全入前五名例有獎金，夥拍雷神兩戰非冠即亞全入Q。呢場「國粹精華」、「勝算高」同「盈豐駿駒」順序跑二至四名，前四名全部排中內檔，最慘係「國粹精華」，至今28戰5亞6季仍未勝，今場又僅敗，黑到冇朋友。
向來只在沙田大賽場合出現之雷神太太，這晚破例來快活谷為「勝利雄心」拉頭馬，並大晒腳背的三粒星紋身，原因是此駒乃雷神今季第100win，亦是他在港第200場頭馬，特別有紀念價值。
蘇偉賢指「勝利雄心」忠心準繩，非常難得，由於馬仔細細，都有擔心馬兒跑得多會跌磅，很高興牠今季長期健康良好，又指莫雷拉發揮出色，是騎者季內第100win很有意義；只是馬兒比較尺寸，下仗上三班當然會有難度。