前無綫藝員王敏明、藝人王維德嘅姐姐同淋巴癌搏鬥6年，最終不敵癌魔，喺個月7號因淋巴癌復發引起併發症逝世，臨終前留畀老公區偉麟最後嘅說話係：「我走啦！天家見啦！」
噚日王敏明喺紅磡世界殯儀館景仰堂設靈，今午以基督教儀式出殯，靈柩會移往大圍富山火葬場火化。目送愛妻離世，一度難過得頭暈手震的區偉麟，噚日下午到靈堂打點，王敏明生前好友韋綺珊、鄭世豪及劉美娟夫婦亦有到場致祭，林淑敏、寶珮如、許愿及王祖藍、李亞男夫婦則送上花牌。
區偉麟受訪時表示心情已經好很多，但一定會不捨得，他說：「我哋拍拖6年，結婚22、23年，成30年冇間斷咁生活，已經融為一體。」不過，佢坦言知道老婆𠵱家去咗一個好好嘅地方，心情都放鬆咗。區偉麟又話：「骨灰會擺喺華人永遠墳場，有教會弟兄安排，靈位係家庭位，可以放4個，將來自己返天家都唔使屋企人操心。」
王維德：佢好錫我
王維德話：「頭幾日完全接受唔到，幾日冇瞓過，4兄弟姐妹中，我同呢個二家姐感情最好，佢好錫我同屋企人。」韋綺珊就話同王敏明認識20多年，佢參加新秀後喺酒廊唱歌，王敏明就係舞蹈員，最後一次見面係今年1月黑妹嘅生日會，但唔知佢有病，喺fb見到大家慰問區偉麟先知，感到好愕然。
撰文：馮仁昭
