《星際啟示錄》有別一般太空科幻片，一大堆物理定律同天文常識，應該嚇怕唔少人。龍叔叔雖然讀文科出身，不過都叫勉強理解到劇情，起碼知佢哋喺度忙緊啲乜，龍嬸嬸就十足十吳若希上身咁，不停咁問「點解嘅？點解嘅？」有氣沒氣，一句「太空嘅嘢係咁㗎喇」，耍開佢就算。大家千祈唔好俾戲內嘅物理現象嚇親，頭半段出現嘅重力、黑洞、光速等，都唔算係難明嘅物理學；到後半電影開始脫離現實，進入到家陣都仲未證實到嘅「空想」理論範籌，妤似蟲洞同五維空間等，就睇到人一頭霧水。理論雖深，但概念都係一字咁淺，如蟲洞即係多啦A夢嘅隨意門，至於五度空間就有唔同嘅學說，按導演基斯杜化路倫（Christopher Nolan）嘅解法，可以理解成一個點播室，唔同時間、空間、人物都可以好似錄影帶咁搵番出嚟播，兼且能有所互動，就如主角整跌書本、留下stay字等，生活中以為係鬼，其實就係五度空間後嘅自己，呢個空間並非存在已久，而係由未來人類發明。當然背後理論深到阿媽都唔識，不過龍嬸嬏聽完龍叔叔一輪發噏風後，忽然好似明解晒咁。
有別於《引力邊緣》、《阿波羅13號》呢類太空災難片，《星》有着令人心悅誠服嘅偉大講故仔技巧，能夠從科學探討出哲學，講父女情可以勁過質量無限大嘅黑洞。由被吸入黑洞，繼而進入第五度空間，主角馬修喺無盡頭嘅一堆立方體度飄浮，嗰種寂寞孤獨感都幾得人驚。最慘係佢老婆早已仙遊，唔似得劉青雲咁有個靚老婆打救，可以隨時「安全地將佢送返地球」。
震到入心嘅聲效
《星》喺今屆奧斯卡共獲得五項提名，包括最佳視覺效果、最佳音效等，幾乎全部都同聲畫相關，可以想像到藍光碟喺視聽享受上，將會有幾震撼。不過龍叔叔諗唔通，點解一隻咁着重聲畫嘅電影，竟然無3D版同Atmos音效，甚至連7.1都冇。不過當睇完成隻碟後，你會驚訝單憑DTS-HD MA 5.1，依然足夠營造到極豐富嘅音場效果，好似初段駕車闖入粟米田，植物同金屬碰撞時嘅「唦唦」聲，可以如斯清脆；其後沙塵暴殺到，又或喺第三星球遇到海嘯等災難，都有極強烈嘅音場包圍感，好似真係俾風沙同海水困住一樣。龍叔叔提醒一句，呢隻港版藍光碟，重低音做得特別重手，太空船抖動、爆炸、海嘯等，比《哥斯拉》及《颶風中心》藍光碟更震耳欲聾，而且大部份唔係震一下半下就算，好多時連綿不絕係咁轟，若同屋企附近屬「隔離咗嘅鄰舍」，勸你都係忍一忍手，音量唔好玩得咁盡好啲。
片長近170分鐘，難怪要分開另一隻bonus disc。港版冇偷懶，附碟收錄bonus由人訪、特技到物理解說都有，長度接近三粒鐘，仲長過套戲，孖碟版索價都係二百蚊有找，太空迷應該心滿意足啦。
Profile：龍叔叔
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。（ http://www.facebook.com/uncle.dragon.movie）
