上網呢樣嘢真係好重要㗎，咁多個立法會議員裏面，究竟邊位嘅網頁最受互聯網社群賞識？八方心諗，應該難唔倒資訊科技界議員莫乃光啦，原來唔係喎，仲有兩位議員叻過佢喎。香港互聯網註冊管理有限公司啱啱舉辦咗「2014最佳.hk網站獎」，呢個獎目的係表揚吓啲優秀網站，喺立法會議員組別中，新民黨葉劉淑儀攞到金獎，大會話佢個網站有專欄文章、個人生活分享，又有連結YouTube上載佢喺議會發言；而銀獎得主就係工黨張超雄，方便視障人士嘅無障礙版本網站，當然係佢強項啦。而莫乃光呢，就只係得到銅獎咋，睇嚟呢位IT界代表，要努力啲啦。