今日出爐嘅政改方案內容，肯定唔夠口號「一定要得」多人關心。好多網民噚日一聽到個「得」字，即時諗起1999年申辦2006年亞運嘅口號「香港一定得！」，當時前政務司司長陳方安生領軍，花咗納稅人5,000萬血汗錢證明係唔得，難怪好多人猶有餘悸，結果網上仲湧現一片惡搞潮，由「一路向北」、「一定死得」以致「一齊變duck」等都有。
社民連同唔少香港人一樣，聽到個口號仲即刻諗起《我個名叫麥兜》一曲，首歌講麥兜最鍾意同書友仔一邊食雞一邊唱歌，雞飯、啫啫雞、雞pat pat、豉油皇雞翼通殺，本來好鬼開心，「但現實就似一隻鴨，吓吓一定要duck，唔得！唔得！點算呀？點樣令隻雞變做鴨？」再加麥太一句，「食食呀食，食懵你！」頓時粉碎佢嘅食雞夢，社記喺社交網站就出圖諷刺，「明明我哋想食雞，林鄭就逼我哋食鴨；我哋想真普選，林鄭就逼我哋袋住假普選先」。