越來越多女性喺不同範疇發揮所長，四大會計師行（Big Four）之一畢馬威都即將出現首位女舵手！《華爾街日報》報道，畢馬威嘅顧問業務主管道蒂（Lynne Doughtie）將於7月1日升任董事長兼行政總裁（CEO），任期5年。
其實德勤2月時已經委任咗首位女CEO，換言之，Big Four入面，有兩間都係女人揸旗，都咪話唔厲害。根據網上資料，標普500指數成份企業當中，只有23間公司嘅舵手係女性，而按《華爾街日報》，30間受聯儲局監管嘅美國銀行當中，都冇一位女性CEO。
Doughtie喺畢馬威做咗30年，2011年開始領導顧問業務，夠晒忠心。原本嘅CEO John Veihmeyer將繼續擔任畢馬威全球董事長。